IMQ-k bularraren irudi sintetikoa txertatu du bularreko minbiziaren detektagarritasuna hobetzeko

23.03.2023

2021ean, Minbiziaren kontrako Espainiako Elkartearen Behategiaren datuek adierazi dutenez, 1.729 bularreko minbizi diagnostikatu ziren Euskadin: horietatik 922, Bizkaian; 554, Gipuzkoan, eta 247, Araban. Onkologia Medikoko Espainiako Sozietatearen datuen arabera, urte berean, Espainian, 33.375 bularreko tumore diagnostikatu ziren, eta 6.000tik gora emakume hil ziren.

Tratamenduan zehar pronostiko hobea lortzeko, bularreko minbiziaren diagnostiko goiztiarrak duen garrantziaz jabetuta, IMQ Zorrotzaurre Klinikak, EAEko osasun-zentro pribatu nagusiak, irudi bidezko diagnostiko zerbitzuari bularraren irudi sintetikoa txertatu dio  tomosintesiarekin erabiltzeko eta estereotaxia digital bertikal bitartez egindako hutsean lagundutako biopsiak egiteko.

Euskal ospitaleko irudi bidezko zerbitzuko arduradun Gonzalo Solís sendagileak azaldu duenez, «2012an gure zentroa aitzindaria izan zen tomosintesia txertatzen, eta, egun, bularreko minbizia diagnostikatzeko dugun gaitasuna beste aurrerapauso bat eman du bularraren irudi sintetikoaren bitartez».

Tomosintesiaren bidez, bularraren ondoz ondoko irudi erradiografiko ugari lortzen dira eta lodierak 1 eta 5 mm artekoak dira. Bularraren irudi sintetikoak bularra bi dimentsiotan osorik berregiteko aukera ematen dio erradiologoari, eta informazio zehatzagoa lortzen du bularraren barne-anatomiari buruz eta haren arkitekturan egon daitezkeen mikrokaltzifikazio, nodulu edo distortsioen kokapen zehatzari buruz.

Espezialistak zehaztu duenez, «tomosintesiari bularraren irudi sintetikoa txertatzeari esker, behar dugun informazio erradiografikoa urrats bakarrean lortzen dugu, orain arte bi urratsetan lortu beharrean, eta horren ondorioz, guruin-erradiazioaren dosia % 43 murrizten da, eta mikrokaltzifikazioen detektagarritasuna % 35 handitzen».

Solís doktorearen hitzetan, «sistema berri horien bidez, pazienteen eskura bularreko minbizia diagnostikatzeko azken teknologia jartzen dugu, bereziki, bularreko ukigarrian ez diren lesioen maneiuan, eta batez ere baliagarriak dira mikrokaltzifikazioak eta distortzio arkitekturalak aztertzeko».

Espezialisten esperientziak eta trebetasunak duten garrantzia

Bularraren irudi sintetikoaren aurrerapen teknologiko berriaz gain, IMQ Zorrotzaurre Klinikako irudi bidezko diagnostikorako  zerbitzuak Bularreko Unitateko langile-taldea sendotu egin du, bi sendagile gehitu baititu: Ainhoa Díaz de Otalora eta Begoña Iturre, hutsean lagundutako biopsiak egiten esperientzia ugaria eta trebezia handia dutenak.

Bularraren irudi sintetikoa erabiltzeak errazten du esterotaxia digital bertikal bidezko hutsean lagundutako biopsiak egitea. «Sistema horren abantaila da mamografo digitalean egokitzen dela, eta, horri esker, bularreko biopsia egin beharreko eremua modu zehatzean koka daiteke, hiru dimentsioko GPS baten moduan, eta xurgapen bidez (hutsaren bidez) laginak lortzen dira, zirkunferentzialki (360 gradukoa)».

«Erauzketa-leiho txikiagoa duten orratzak erabiliz gero, biopsia-sistema horiek erabil daitezke tamaina txikiko bularretan edo oso azalean kokatutako lesioetan. Bular trinkoetan, hutsuneak luzaroago jardutea eta ebaketa-mugimendua motelagoa izatea aukera dezakegu. Oro har, biopsia azkarreko sistema bat da, eta anestesiko lokalaren kantitate txiki bat baino ez du behar biopsiako eremuan, eta, oro har, pazienteek ondo jasaten dute», adierazi du IMQ Zorrotzaurre Klinikako Irudi bidezko Diagnostikoko zerbitzuko arduradunak.

Biopsia-mota horietan lortutako laginak kapsula txiki batean gordetzen dira, eta kapsula hori prozesuan zehar atera daiteke, biopsia zuzena den egiazta baitaiteke (mikrokaltzifikazioen kasuan). Sistemak aukera ematen du markatze-klipak jartzeko geroko abordatze kirurgiko baterako, beharrezkoa izanez gero.

Ahalik eta segurtasun handiena pazienteentzat

Diagnostikatzeko metodo berri horiek IMQ Zorrotzaurre Klinikako Irudi bidezko Diagnostikoko zerbitzuan badauden tomosintesiaren bidezko mamografo digitalaren eta  erresonantzia magnetikoen osagarri dira. Halaber, «hainbat alderdik, mamografoak bularra automatikoki konprimitzeak, esaterako, irudi mamografikoa beharrezko kalitatearekin lortzea ziurtatzen du, pazienteei ahalik eta bularra konprimitzearen ondoriozko eragozpen gutxien eraginez», adierazi du.

Horrez gain, erradiologoak azpimarratu nahi izan du zein garrantzitsua den pazientearen segurtasun klinikorako «biopsiak ospitale-euskarri osoa duten zentroetan, hala nola Zorrotzaurren, egitea, behar izanez gero, aparteko segurtasuna izateko».