IMQ Taldeko Presidentetzaren prentsa oharra

21.10.2020

Egunkarietan eta beste hedabide batzuetan egindako iruzkin jakin batzuei dagokienez, IMQ-ko Medikuen Sozietatearen Presidentetzak beharrezkotzat jo du akziodunei, Taldeko langileei eta asegurudunei alderdi hauek argitzea:

1.- Lehenik eta behin, adierazi beharra dago ez dagoela inolako akordiorik SCA-Adeslas-ekin edo beste edozein erakunderekin IMQ Taldea edo horren edozein sozietate saltzeko; beraz, Akziodunen Batzar Nagusian Kontseiluak ez du baimenik eskatuko beste edozein eragiketa korporatibo saldu edo egikaritzeko.

Izan ere, lehen bilera horretan, Kontseiluak Akziodunen Batzar Nagusiari baimena eskatu besterik ez du egingo, prozesu bati ekiteko, hain zuzen akziodun askok beren akzioak, orain edo etorkizunean, enpresaren balioaren araberako prezioan saltzeko adierazi duten interesari irtenbidea emateko.

2.- Akziodunen Batzar Nagusiaren babesa jaso ondoren, Kontseiluak ahalegin handia egingo du eragiketaren baldintzak xehe-xehe taxutu eta negoziatzeko, eta ondoren, beste Batzar Nagusi batean haiek onets ditzaten eskatuko die akziodunei, edozein erabaki itxi aurretik.   

3.- Akziodunetako inor ez da behartuko bere akzioak saltzera, baina guztiek izango dute, hasieratik eta berme sendoan oinarrituta, epe labur, ertain eta luzean saldu ahal izateko eskubidea, montepioan dituzten eskubide guztiak galdu gabe, ezta talde medikoko kide izateko eskubidea ere.    

4.- Kontseiluak berriro adierazi du konpromiso irmoa duela Akziodunen Batzar Nagusiari aurkeztuko zaion eragiketa korporatiboak printzipio hauek errespeta ditzan:

• IMQren identitateari, markari eta balioei eutsi egingo diela, eta egoitza soziala eta fiskala Euskadin egoten jarraituko duela.
• Akzioak saldu nahi dituzten akziodunei konponbide gogobetekoa emango zaiela, Taldearen ondare- eta finantza-kaudimenari kalte egin gabe.
• Benetako bermea, etorkizunean saltzea erabakitzen dutenentzat, hasieran saltzen dutenen baldintza berberetan egin dezaten.
• Esparru egonkor eta erakargarri bat sustatzea jardunean jarraitzen duten edo talde medikoan sartzen diren medikuentzat, IMQ lehen mailako aseguratzaile izaten jarrai dezan, egunez egun bere asegurudunen konfiantza bereganatuz eta asistentzia-ereduari eutsiz, familia-medikuen figura barne.
• Bere jabetzako ospitale-zerbitzuak kontserbatu eta hobetzea.
• Montepiora egindako ekarpenak bermatzea eta harekiko harremanak sustatzea.
• Enpleguari eustea.

Azken finean, Kontseiluak funtsezkotzat jotzen du IMQ-k Euskadiko erreferentziazko erakundea izaten jarrai dezala. Hori dela eta, bazkidegai batek lehentasunezko helburutzat hartu beharko du 86 urteetan zehar bere asegurudunen eta, oro har, Euskadiko osasunaren zerbitzura hain ondo funtzionatu duen ereduari eustea.