FVEM-k lankidetza hitzarmena berritu du IMQ-rekin metalgintza sektoreko osasun aseguramendua bultzatzeko

20.03.2024

Metalgintzako Enpresen Bizkaiko Federazioak (FVEM) oraintsu berritu du 2015. urtetik Igualatorio Médico Quirúrgico-rekin (IMQ) duen lankidetza-hitzarmena, metalgintza sektoreko enpresen osasun-aseguramendua bultzatzen jarraitzeko.

Hala, Metalgintzako Enpresen Bizkaiko Federazioko (FVEM) presidente Begoña San Miguelek eta IMQ-ko negozio-garapeneko eta salmenta-kanaletako zuzendari Luis Fernández de Larreak sinatu dute akordioa eguneratzeko agiria, FVEMren egoitzan, metalgintza sektoreko enpresek eta pertsonek Euskadiko aseguru mediko nagusiaren –1.000 enpresa eta 385.000 asegurudun baino gehiago estaldurapean– abantailez goza dezaten.

Osasun-asegurua edukitzea langileek gaur egun enpresetan gehien aintzat hartzen duten gizarte-onuretako bat ez ezik, ezinbesteko faktore ere bihurtu da enpresen lehiakortasuna hobetzeko ahaleginaren barruan. Izan ere, arreta medikoa azkar, moldakortasunez eta osotasunez eskuratzea dakarrenez, enpresa-proiektuarekin gehiago inplikatzea eta pertenentzia-sentimendu handiagoa errazten ditu, talentua erakartzen du eta absentismoa (Euskadiko arazo nabarmena) murrizten laguntzen du.

Hitzarmenari esker, Bizkaiko metalgintza sektoreko 900 enpresa eta 35.000 langile inguruk abantaila handiak eskuratuko dituzte osasun-asegurua kontratatzean; hala, lehen mailako osasun-laguntza espezializatua, diagnostikoa, larrialdietakoa eta ospitalizaziokoa ez ezik, EAEko osasun pribatuko mediku eta espezialisten talde ugarienaren eta Euskadiko eta Euskaditik kanpoko zentro eta klinika propioen sare zabalenaren artean hautatzeko askatasuna ere izango dute estalduraren barruan. Hori guztia, arreta pertsonalizatua, itxaronaldirik gabe, kontsulta-ordutegi moldakorra eta abangoardiako teknologiak babestutako asistentzia-kalitatea izanda.

Halaber, IMQ-k asegurudunei doan eskaintzen dizkien telemedikuntza-zerbitzu digitalak ere eskura izateko aukerak (plataforma batzuen eskutik, txat eta bideokontsulta bidez asistentzia berehala eskura daiteke) eta prebentzio-programek balio bereizgarria dakarkiete FVEMko enpresei eta langileei.