Athleticeko neskek denboraldiko lehen azterketa medikoa gainditu dute Zorrotzaurre Klinikaren Kirol Medikuntzaren Unitatean

23.07.2018

• Aurten lehen aldiz, jokalariei oinkada ere aztertu zaie.

• Denboraldi-aurrearen hasiera markatu ohi du azterketak. Izan ere, bihar, uztailaren 24an –asteartea– hasiko da aurten, taldearen aurkezpen ofizialaren eskutik.

Nesken taldea era ofizialean aurkezteko egun bakarra falta denean, Athletic Clubeko jokalariei denboraldiko lehenengo osasun-azterketa egin zaie Bilboko Zorrotzaurreko IMQ Klinikaren Kirol Medikuntzako Unitatearen instalazioetan. Emakumezkoen talde zuri-gorriari, urtero bezala, goi-lehiaketazko kirol-azterketa mediko osoa egin zaie.

Lehen talde zuri-gorriko 23 jokalari igaro dira osasun-instalazio horietatik gaur, goi-lehiaketazko kirol-azterketa baten bitartez, beraien osasun-egoera eta kirol-errendimendua egiaztatzeko, aurre-denboraldia taldearekin jokatu ahal izateko (ala ez).

IMQ-ko kirol-medikuntzako espezialista Pablo Aranda sendagileak azaldu duenez, proba honen bidez ekin zaio azterketari: “lehenik, odol-laginak atera ditugu, analisi klinikoa egiteko, odol-gazurraren hainbat alde biokimiko egiaztatzeko. Ondoren, balorazio zineantropometrikoa (pisua, altuera eta tolesturak) egin dugu”.

1998/99 denboralditik Athletic Cluben aseguratzaile mediko ofiziala den IMQren eskutik neskei egin zaien azterketak –uztailaren 6an mutilei egindakoak bezala–, test hauek ere barne hartu ditu: test isozinetikoa, indarra eta giltzaduren mugikortasuna neurtzeko testa, elektrokardiograma basala eta esfortzu-proba.

Halaber, proba hauek ere egin zaizkie: bihotzaren eta biriken auskultazioa, lokomozio-aparatuaren miaketa, gorputz-osaera eta gantz-portzentajea neurtzea, esfortzu-proba maximoa zinta irristakorrean eta pultsu kardiakoak lortzea. Hori guztia, kirol-baldintzak hobetu eta entrenamendua jokalariei egokitzeko.

Zigor Madaria IMQ-ko kirol-kardiologoarekin elkarlanean, jokalariei atsedeneko balorazioa egin zaie (bihotzaren auskultazioa, biriken auskultazioa, atsedeneko elektrokardiograma eta esfortzu-proba laktatoekin).

“Esfortzu-proba maximoa laktatoekin egitean, jokalari bakoitzaren maila aerobikoa eta anaerobikoa  ezagutzen dira,entrenamendu-saioak hobeto programatzeko, kirol-errendimendua hobetzearren”, azaldu du Pablo Aranda medikuak.

Oinkada aztertzea

Aurten lehen aldiz,Athletic Clubeko jokalariei oinkada ere aztertu zaie, hots, azterketa biomekanikoa egin zaie oinei: beheko gorputz-adarrei eta oinei miaketa-probak egin zaizkie, hala nola, giltzaduren egonkortasun-mailak, bihurdura-ereduak, disimetriak zehaztu eta muskulu-kateak eta jarrerak aztertu, baita oin-zolako presioak eta ibileraren eta kirol-keinu eta keinu teknikoa ere.

Horrela, elementu zuzentzaile edo orekatzaileen bidez, oinaren asaldura biomekanikoak antzeman daitezke eta mediku baten aginduz, orekatu. Eta oinkada eta euste-puntuak hobetzean, jokalarien kirol-errendimendua hobetu eta lesionatzeko arriskua txikiagotzen da.