IMQ-k babesletza berritu du Realarekin eta 18 urte bete dituen itun estrategikoa sendotu du

10.02.2026

Marea urdinek bat egin dute berriro. Realak eta IMQ-k lankidetza-hitzarmena berritu dute datozen bi denboraldietarako, euskal aseguratzailea talde txuri-urdinaren babesle leiala izaten jarraitzeko.

Realeko presidente Jokin Aperribayek IMQ Seguros-eko zuzendari nagusi Javier F. Maizteguiri harrera egin dio Anoetan, 2027ko ekainera arte indarrean iraungo duen akordioa formalizatzeko.

Realak jarraitzen du izaten jarraitzaile gehien eta eragin sozial handiena duen klubetako bat. Babesletza berritu izanak osasuna, kirola eta komunitatearekiko konpromisoa uztartzen dituen proiektu partekatu baten ikusgarritasuna indartzen du.

Jokin Aperribay Realeko presidenteak positibotzat jo du lankidetza horren jarraipena: “Guretzat, arras pozgarria da IMQ gure ondoan izatea. Hainbeste urtez elkarrekin lan egin ondoren, IMQ familia txuri-urdinaren parte sentitzen dugu. Zinez eskertzen ditugu haren konfiantza eta klubari etengabe emandako laguntza”.

Bestalde, IMQ Seguros-eko zuzendari nagusi Javier F. Maizteguik aliantza horren garrantzia azpimarratu du: “Realarekin berritzea osasuna, kirola eta balioak uztartzen dituen bide partekatua berrestea da. Ohorea da zelai barruan eta kanpoan erreferente den klub bati laguntzen jarraitzea, eta zalego konprometituarengandik gertu egotea”.

IMQ-k, horrela, eliteko kirolari ez ezik, oinarrizko kirolari ere egiten dion ekarpena indartzen du, Real Sociedad Fundazioari kasu. Izan ere, Fundazioaren helburua kirol-, kultura- eta gizarte-jarduerak zabaltzea, sustatzea eta bultzatzea da, besteak beste, kirola gizartera hurbiltzea eta, kategoria eta adin guztietan kirola egitea erraztea. Era berean, Realzale Programaren (Realaren fidelizatzeko plana) lehen egunetik ere parte hartzen du IMQ-k, eta hari esker, bazkideek urteko kuotan dirua aurreztea lortzen dute.

Reala babesteaz gain, IMQ ere bada Euskadiko kirol-klub nagusien aseguratzaile mediko ofiziala, esaterako Eibar, Athletic Club, Surne Bilbao, Baskonia eta Deportivo Alavés taldeena, besteak beste.