IMQ Zorrotzaurre Klinikak minbiziaren kontrako azken belaunaldiko ekipamendu erradioterapikoa gehitu du azeleragailu lineal berri batekin

09.07.2020

IMQ Zorrotzaurre Klinikak minbiziaren kontrako erradioterapia-tratamenduetarako azken belaunaldiko baliabideak gehitu ditu, elektroien VarianTruebeam azeleragailu lineal berria instalatu baita bertan. Azeleragailu hori klinikako beste baten “bikia” da eta egungo Oncor-en ordez jarri da. Hura instalatzeko, egiturazko segurtasun-neurri zorrotzak hartu dira, ekipamenduaren tamaina, pisu eta sentsibilitatearen arabera. Izan ere, azeleragailu berriak tratamendu onkologikoetan behar izaten diren saio-kopurua gutxitzen du, albo-ondorioak minimizatzen ditu eta, hortaz, pazienteen bizi-kalitatea  hobetzen du.

TrueBeam-i esker, tratamenduak zehaztasun handiagoaz egin daitezke, erradiazioa tratatu beharreko tumorearen bolumenaren gainera bakarrik zuzentzen delako eta erradiazio-dosi oso altuak segundo gutxitan ematen direlako eta, hortaz, tumorearen inguruko ehun osasuntsua ahalik eta gehien babesten delako.

Aitzindaria izan zen Klinika Euskadin, azeleragailu-modelo hori eduki zuen lehenengo zentroa izan zelako. Modelo horrek ezaugarri bikainak dituenez, oso eraginkorra eta segurua da tumoreei aurre egiteko. Aldi berean, TrueBeam azeleragailua ezin hobea da tratamendu-teknika berrietarako: hala nola, VMAT RapidArc, SBRT arnas sinkronizazioarekin eta SRS (erradiokirurgia).

Halaber, tresna berriak txertatu dira bi azeleragailuetarako, paziente bakoitzari ematen zaion tratamenduaren planaren hautespena, kalitate-kontrola eta tratamenduaren segurtasun osoa are gehiago hobetzeko.

Goi-teknologiako ekipamenduan egindako inbertsio berria lehenengo azeleragailua eskuratu zenetik 5 urtera egin da, eta hari esker, abangoardia teknologikoan egoten jarrai daiteke, erradioterapia bidezko tratamenduetan teknika berrienak eta aurreratuenak eskaintzeko.