SD Eibar taldeko emakumezkoen lehen taldeko jokalariek azterketa medikoak gainditu dituzte IMQ-ren Kirol Medikuntzako Unitatean

21.07.2020

• Armaginek, osasun-azterketak igaro ondoren, bihar hasiko dituzte entrenamenduak.

SD Eibar klubeko emakumezkoen lehen taldeak gaur goizean hasi du denboraldi-aurrea, azterketa medikoen eskutik, IMQ-ko Zorrotzaurreko Klinikaren Kirol Medikuntzako Unitatean. Goizeko lehen ordutik, Iker Dorronsoro entrenatzaile duten jokalariek ohiko probak gainditu dituzte, COVID-19aren aurkako segurtasun-neurriak aldi oro aplikatu direla.

Proba medikoak –zeinetan Ion Zabaleta, SD Eibarko emakumezkoen taldearen arduraduna ere egon den– Alberto Fernández medikuak egin ditu, hala nola, esfortzu-proba maximo laktatoekin, jokalari bakoitzaren maila aerobikoa eta anaerobikoa ezagutzeko. Proba hori oso baliagarria da entrenamendu-saioak hobeto programatu ahal izateko.

Armaginek bihartik aurrera hasiko dituzte entrenamenduak Unbeko kirol-instalazioetan. Ohi baino luzeagoa izango da denboraldi-aurrea, pandemiaren ondoriozko geldialdiagatik. Taldeak ez du segundo bat ere galdu nahi lehen mailara itzultzeko prestaketan. Reto Iberdrolan denboraldi bikaina egin ondoren, Dorronsororen neskek erronka zorrotz eta zail bati aurre emango diote, ilusioz eta gogoz blai.

IMQ, SD Eibar taldearen aseguratzaile mediko ofiziala

IMQ da SD Eibar taldearen aseguratzaile mediko ofiziala 2016/2017denboralditik. IMQren Kirol Medikuntza Unitateek, hala nola, IMQ Zorrotzaurre klinikarenak, IMQ Zurriola zentro medikoarenak eta IMQ Amárica zentro medikoarenak punta-puntako teknologia dute kirol-arloan, baita kardiologiako eta kirol-medikuntzako mediku espezialistak eta errehabilitazio eta fisioterapia zerbitzua ere.