ADEGI-k eta IMQ-k Gipuzkoako enpresen osasuna eta lehiakortasuna indartzeko hitzarmena berritu dute

24.03.2026

Adegi-k eta IMQ-k euren arteko lankidetza-hitzarmena berritu dute, enpresa elkartuei eta haien langileei osasun-estaldura pribatu osoa, moldakorra eta ongizatera bideratua eskaintzen jarraitzeko. Akordioa berritu izanak duela hamarkada bat baino gehiago hasitako aliantza sendotu egin du; izan ere, urtez urte, garrantzia hartzen ari da hitzarmena absentismoaren gorakadak eta talentua erakartzeko eta fidelizatzeko beharrak markatutako egungo testuinguruan.

Euskadi da Estatuan lan-absentismo handiena duen erkidegoa; izan ere, 2025ean itundutako orduen % 9,1 galdu ziren, Estatuko % 7ko batez bestekoaren oso gainetik. Eragin itzel horrek galera ekonomikoak, antolaketa-tentsioak eta produktibitatearen murrizketa dakartza. Egoera horretan, kontsulta medikoak, proba diagnostikoak eta espezialistak azkar eskuratzeko aukera funtsezko bihurtu dira baja-denborak murrizteko eta langileen osasunaren zaintza hobetzeko

Adegiren 2025eko Gipuzkoako Absentismoari buruzko Inkestaren arabera, aldi baterako ezintasunagatiko absentismoa lan egindako orduen % 6,9ra igo zen 2025ean, hau da, urtean 120 ordu inguru pertsonako, plantillaren % 38 gutxienez ez zen behin agertu lanean, eta batez beste 38,5 eguneko baja hartu zen pertsona bakoitzeko. Gipuzkoan absentismoak eragin handiena sektore hauetan izan du: Merkataritza, Garraioa eta Biltegiratzea (% 10,4), eta 500 langiletik gorako enpresen absentismo-tasak % 12,7 baino handiagoak dira. Testuinguru horretan, osasun pribatuak egoera hori arintzen laguntzen du, atzerapenak saihesten eta lana eta familia uztartzen hobetzen duen arreta arina ematen baitu.

Hitzarmena berritzean, Adegi-k eta IMQ-k 1.200 enpresa baino gehiagoren eskura jarri dituzte Gipuzkoako errealitatera egokitutako osasun-konponbide presentzialak eta digitalak –hala nola bideo-kontsulta, orientabide medikoa eta prebentzio-programak–; hala, enpresa eta langileentzako itzulkin sozial eta produktibo ukigarria bultzatzen dituzte eta osasun-arreta arina sustatzen dute, osasun-bajagatiko absentismoa murrizten eta lurraldearen lehiakortasuna indartzen laguntzeko.