Arritmiak garaiz detektatzeak tratamendua hobetzen eta bihotza babesten laguntzen du

29.06.2026

Bihotzeko arritmiak bihotzaren erritmoaren alterazioak dira. Kasu batzuetan, palpitazioak, zorabioak, nekea edo konortea galtzea eragiten dute arritmiek. Beste batzuetan, ordea, ez dute sintoma argirik sortzen, eta hainbat hilabetez edo urtez ere egon daitezke ezkutuan.

Izan ere, eboluzio isila da arazo nagusietako bat. Arritmiak denboran zehar badirau, litekeena da bihotzean aldaketak gertatzea: bihotz-barrunbeak dilatatu egin daitezke, bihotzeko muskuluak fibrosi edo orbain aldeak gara ditzake eta arritmia iraunarazten duten zirkuitu elektriko berriak ager daitezke. Prozesu horri bihotz-birmoldaketa esaten zaio.

Hori dela eta, arritmia garaiz detektatzeak tratamendua lehenago hasteko aukerak ez ezik, bihotzak oraindik ere baldintza hobeak dituenean jokatzeko aukerak ere ugaritzen ditu.

«Ablazioen emaitzak hobeak izango dira pazientea zenbat eta lehenago tratatzen bada. Bihotza ez da berdina arritmiaren hasieran edo harekin hilabeteak edo urteak eman ondoren», azaldu du Jesús Daniel “Txules” Martínez Alday doktoreak, IMQ Zorrotzaurre Klinikako arritmietan espezializatutako kardiologo electrofisiologoak.

IMQ-ko bihotz-elektrofisiologia taldeko kidea da espezialista, José Miguel Ormaetxe Merodio, Íñigo Sainz Godoy eta María Fe Arcocha Torres doktoreekin batera.

Prebentzioa eta diagnostiko goiztiarra ‘Lehenengoa, prebenitzea’ ekimenaren parte da. Hori IMQ-k sustatu du, prebentzioa osasun-estrategiaren ardatzetako bat izan dadin.

Fibrilazio aurikularra: ohikoa, isila eta iktusa gertatzeko arriskua dakarrena

Fibrilazio aurikularra arritmiarik ohikoena da helduengan. Izan ere, Euskadiko 40 urtetik gorako biztanleen % 4-%5i eragiten die, hots, 60.000 pertsona ingururi.

Paziente guztiek ez dute tratamendu bera behar izaten. Batzuek jarraipen kardiologikoa baino ez dute behar izaten. Beste batzuek, berriz, botikak, antikoagulazioa edo arritmia kontrolatzeko edo ezabatzeko eta bihotz-erritmo egokia berreskuratzeko prozedurak.

Haien garrantzia ez da mugatzen palpitazioetara edo erritmo irregularraren sentsaziora. Fibrilazio aurikularrak areagotu egiten du bihotz barruan odolbatuak sortzeko arriskua. Odolbildu horietako bat garunera joaten bada, iktusa eragingo du zenbaitetan.

Euskadin 3.000 iktus inguru gertatzen dira urtero, eta kalkuluen arabera, bosten bat, urtean 600 kasu inguru, fibrilazio aurikularrarekin lotuta dago.

«Funtsezkoa da paziente horiek berehala identifikatzea. Fibrilazio aurikularrak enboliak eta iktusak eragin ditzake, eta, gainera, hark jotako pertsonen herenak ez du sintomarik, eta, hortaz, ez daki arritmiarik duenik», ohartarazi du Martínez Alday sendagileak.

Baheketa bereziki garrantzitsua da hipertentsioa, diabetesa, obesitatea, tabakismoa edo arrisku kardiobaskularreko beste faktore batzuk dituzten pertsonengan. Hala, bai lehen mailako arretak, bai kardiologiako kontsultek funtsezko zeregina dute.

«Infartuaren ohiko arrisku-faktoreek ere areagotu egiten dute arritmiak garatzeko arriskua. Paziente horiei arreta berezia jarri behar zaie», adierazi du espezialistak.

Hiru hamarkada IMQn arritmiak tratatzen

IMQ-k bihotz-elektrofisiologiako prozedurak egiten ditu 1996tik. Jarduera hori garai bateko Vicente San Sebastián klinikan hasi zen, eta gaur egun IMQ Zorrotzaurre klinikan garatzen da, hots, Euskadiko ospitale pribatu nagusian.

Taldeak José Miguel Ormaetxe Merodio eta Jesús Daniel “Txules” Martínez Alday doktoreekin hasi zuen jardunbidea. Ondoren, haiei Íñigo Sainz Godoy eta María Fe Arcocha Torres kardiologo elektrofisiologoak gehitu zitzaizkien.

Gaur egun, lau espezialistek 200 eta 250 ablazio-prozedura artean egiten dituzte urtean. Prozedura horiei esker, hainbat arritmia diagnostikatu eta tratatu daitezke zainetatik edo arterietatik bihotzera arte sartzen diren kateterren bidez.

Haietan, taldeak arritmia eragin duen fokua edo zirkuitu elektrikoa aurkitzen du. Ahal bada, alde hori ablazioaren bidez tratatuko da, hots, ohiz kanpoko erritmoa eragin duen ehuna neutralizatzeko aukera ematen duen teknikaren bidez.

«Gaur egun eskuragarri dagoen teknologiak aukera ematen du arritmiak zehaztasun handiz aztertzeko, prozedura batzuk laburtzeko eta kasu gero eta konplexuagoei segurtasun handiagoz heltzeko», azpimarratu du IMQ-ko espezialistak.

Ablazio batzuk anestesia orokorrarekin egiten dira, eta beste batzuk, sedazio arinarekin, arritmia-motaren, prozeduraren konplexutasunaren eta pazientearen ezaugarrien arabera. Zorrotz adierazi eta egin beharreko zauri handiko teknikak badira ere, aurrerapen teknologikoek haien segurtasuna eta eraginkortasuna hobetzen lagundu dute.

Ablazioa: emaitza hobeak garaiz jokatzen bada

Gazteengan, arritmia asko onberak dira, eta ez dute bizi-itxaropena murrizten, baina bizi-kalitatean eragin handia izan dezakete. Palpitazio krisiek, bihotz-erritmoaren kontrola galdu delako sentsazioak edo gertakari berriak gertatzeko beldurrak eguneroko jarduera, kirola edo atsedena mugatu ditzazakete.

Pertsona-talde horretan, ablazioak arrakasta-tasa oso handiak izan ditzake, batez ere ondo kokatutako arritmietan eta zirkuitu elektriko zehaztuak badituzte.

Fibrilazio aurikularra duten adineko pazienteei dagokienez, emaitzak faktore askoren araberakoak dira: arritmiaren eboluzio-denbora, aurikularen tamaina, fibrosia dagoen, beste gaixotasun kardiobaskular batzuk eta pazientearen egoera orokorra.

«Ez dago kasu guztietan aplika daitekeen ehuneko bakarra. Paziente bakoitza desberdina da. Baina badago ideia argi bat: bihotzak zenbat eta denbora gutxiago eraman fibrilazio aurikularrean, orduan eta handiagoak izango dira arrakasta izateko aukerak», azpimarratu du kardiologoak.

Paziente askorengan, ablazioak arritmia kontrolatzea lortzen badu ere, gerta liteke tratamendu antikoagulatzaileari eutsi behar izatea iktusa gertatzeko arriskua murrizteko. Erabaki hori pertsona bakoitzaren arrisku profilaren arabera indibidualizatzen da.

Taupada-markagailua elektrodorik gabe arritmia motelentzat

Arritmia guztiek ez dute bihotzak taupadak azkarregi eginarazten. Arritimia batzuek hain zuzen kontrakoa eragiten dute: erritmo motelegia edo etenaldiak, zorabioa, nekea edo konortea galtzea eragin dezaketenak.

Horielakoetan, litekeena da beharrezkoa izatea taupada-markagailu bat ezartzea. Euskadin 2.200 taupagailu inguru jartzen dira urtero.

Azken urteotako berrikuntzetako bat elektrodorik gabeko taupada-markagailuen erabilera da. Ohiko taupada-markagailuek ez bezala, taupagailu haiek ez dute kablerik behar bihotz barruan. Eta horrek elektrodoekin lotutako konplikazio batzuk murriztu ditzake, hala nola infekzioak edo kableekin zerikusia duten arazo mekanikoak.

IMQ-k hautatutako pazienteengan ere txertatu du teknologia hori. Talde espezializatuek ezagutzen duten prozedura baten bidez ezartzen da gailua, eta aukera ematen du bihotz barruko kableekiko mendekotasun txikiagoa duen beste aukera bat eskaintzeko.

Noiz kontsultatu

Arritmia baten sintomak oso bestelakoak izan daitezke pertsonen artean. Ohikoena palpitazioak dira, bihotz-taupada azkarrak, irregularrak edo bereziki biziak bularrean edo lepoan.

Zorabioak, arrazoirik gabeko nekea, aire falta, toraxeko mina, tentsio jaitsierak edo konortea galtzea ere ager daitezke. Hainbatetan, arritmiak ez dakar inolako sintomarik, eta azterketa batean, elektrokardiograma batean edo monitorizazio-gailuen bidez detektatzen da.

Arritmia gehienak ez dira hil edo bizikoak, baina aztertzea komeni da. Garaiz kontsultatzeak aukera ematen du diagnostikoa berresteko, arriskua baloratzeko eta tratamendurik egokiena erabakitzeko.

Jarduera esku-hartzailea ez ezik, IMQ-k milaka kontsulta kardiologiko ere egiten ditu paziente horien diagnostikoa, jarraipena eta tratamendua egiteko. Esperientzia klinikoa, arreta koordinatua eta teknologia aurreratua batu izanari esker, arritmia ohikoenetan zein konplexutasun handieneko kasuetan esku har daiteke.

«Gaur egun, botika eraginkorrak, teknika esku-hartzaile sendoak eta teknologia oso zehatza ditugu eskura. Baina erronka nagusia berbera da oraindik ere: arritmia detektatzea bihotza aldatu eta tratamendua zailagoa izan aurretik», amaitu du azaltzen Martínez Alday doktoreak.