IMQ-k erditzeko prestakuntzarako unitate bat abiarazi du Zorrotzaurre Klinikan

02.05.2025

Emaginen Nazioarteko Eguna dela eta (urtero maiatzaren 5ean ospatzen da), IMQ Zorrotzaurre Klinikak Erditzeko prestakuntzarako Unitate berria abiaraziko duela ezagutarazi du.

Zerbitzu berri horri esker, zentro horretan —Euskadiko ospitale pribatu nagusia— erdituko diren emakumeek emaginekin harremana sortu ahal izango dute hasiera-hasieratik.IMQ Kliniketako Erizaintzako arduradun Laura Hojasek nabarmendu duenez, «unitate berriak diziplina anitzeko talde ugaria eta aditua bildu du, zeinean emaginek zeregin nagusia duten, bai haurdunaldian, bai erditzean eta bai erdiberriaroan».

Unitate berriak hainbat ekimen batu ditu; alde batetik, umea jaio aurreko bisiten sistema ezarri da, «erditze-plan bat nola lantzen den jakin nahi duten emakumeei eta haiekin datozenei zuzenduta, edo klinikan erditu aurretik zalantzak argitzeko», adierazi du Laura Hojasek.

Umea jaio aurreko bisita horietan, «ama askorentzat ezezagunak diren eguneroko ekintzak bultzatzen dira, hala nola emakumearen erditze-planaren plangintza, mina maneiatzeko dauden teknikak (pilota bereziak erabiltzea, oxido nitrosoa maneiatzea, analgesia epidural ibiltariaren edo walking epiduralaren bidez, eta beste batzuk), erditzearen osteko prozesua, ospitaleratzea, jaioberriaren zaintzak eta egonaldian laguntzea, besteak beste».

Erditzeko prestakuntza-eskolak dira Unitate berriaren beste jarduera batzuk. Izan ere, eskola horiek apirilaren 30ean hasi dira, eta aukera ematen diete dozenaka emakumeri zerbitzu berria jasotzeko. «Espero dugu IMQ Zorrotzaurre Klinikan emagin talde ugarian konfiantza jarri duten emakume asko artatu ahal izatea», azpimarratu du IMQ-ko arduradunak.

Euskadiko aseguratzaileko emaginen beste ekimen bat erditze bigundua lortzea da: «eremu horretan, ama eta jaioberria larruazala larruazalarekin egotea sustatzen dugu, zilbor-hestearen eskutze atzeratua edota plazenta paperean inprimatzeko aukera, une berezi horren oroigarri gisa, eta beste ekimen batzuk».

Aurrekoaren ildotik, ahaleginak egin dira, halaber, zesarea leundua eskaintzeko, «une horretan amarekin datorrenari aukera emanez, haren ondoan egon dadin».

IMQ Kliniketako Erizaintzako arduradunak gogorarazi du, halaber, emaginek edoskitzaroan laguntzeko abian jarritako ekimenak, eta horietako garrantzitsuenak, «ziurtapen gailenek, esaterako IHANek babesten dituzte». Hori Jaiotze eta Edoskitze Laguntza Humanizatzeko Ekimena da, zeina 1991. urtean OMEk eta UNICEFek abian jarri zuten eta BFHI (Baby Friendly Hospital Iniciative, ingelesezko sigletan) nazioarteko estrategiaren parte den, eta, gaur egun, ospitaleetarako asistentzia-kalitate obstetriko-jaioberriaren markatzaile onenetarikoa den.

Konpromisoa ama-haurraren osasunarekin

Laura Hojasek gogorarazi du IMQ osoak eta bereziki Taldeko emaginek ama-haurren osasunarekin duten konpromisoa, eta hori agerian geratu da «erditzearen aurretik, bitartean eta ondoren ematen den kalitatezko arretan, amen eta jaioberrien ongizatea bermatzeko».

Premisa horren arabera, IMQ-ko emaginek egunez egun lan egiten dute emakumeei arreta emateko «erditze-prozesu indibidualizatu batean, aurreko garaietan baino ikuspegi askoz ere bigunduagoarekin; izan ere, joera horren arabera prestatzen eta lan egiten dugu».

«Emagina funtsezko pieza da zeregin horretan, eta, urtero, maiatzaren 5ean, bat egiten dugu OMEren mundu-mailako kanpainarekin, eta #EmaginenMundukoEguna ospatzen dugu, eskerrak emanez haiek egiten duten asistentzia-lan itzelagatik eta bizitzako etapa guztietan emakumeen osasunarekin duten konpromisoagatik», amaitu du azaltzen IMQ-ko arduradunak.