IMQ-k eta UNICEF Espainiak hitzarmena berritu dute, haurren eta nerabeen osasun mentala sustatzeko helburuarekin

28.01.2026

IMQk eta UNICEF Espainiak 20 urteko lankidetza-hitzarmena berritu dute gaur, haurren eskubideak babesteko eta sustatzeko konpromisoa sendotuz. Oraingo honetan, gainera, hitzarmenaren helburuak birbideratu dituzte eta arreta berezia jarri dute gaur egungo erronka soziosanitario handienetako batean: haurren eta nerabeen osasun mentalean, hain zuzen ere.

Javier Maiztegui IMQ Seguros aseguru-etxeko zuzendari nagusiak eta Joseba Madariaga UNICEF Euskadiko Batzordeko presidenteak Bilbon egindako ekitaldian sinatu dute hitzarmena eta UNICEFek haurren osasun mentalaren errealitatea eraldatzeko estatu mailan sustatzen duen eragile anitzeko aliantzaren baitan kokatzen da. Izan ere, IMQ Euskal Autonomia Erkidegoan erreferentziazko osasun-aktore gisa bat egin zuen aliantzarekin duela gutxi.

Halaber, lankidetzaren helburua da osasun mentaleko zerbitzuetarako sarbidean ekitatea sustatzea mundu mailan. Horretarako, IMQk UNICEFen Larrialdietarako Funts Globala babestuko du laguntza korporatibo batekin eta IMQ Solidario polizarekin. Poliza horren bidez, aseguratutako pertsonek haurren laguntza psikosozialean lagundu ahal izango dute larrialdi-egoeretan.

Bi erakundeak lotzen dituen hitzarmena 2006an sinatu zuten lehen aldiz, eta, harrezkero, etengabe berritu dute konpromisoak erronka sozial eta sanitario berrietara egokitzeko. Gaur sinatutako berritzeak jarraipena ematen dio UNICEF Espainiaren eta IMQ euskal osasun pribatuko aseguru-etxe liderraren arteko harremanari eta aliantza egonkor eta iraunkor bat finkatzen du haur eta nerabe zaurgarrienen alde.

Haurren eta nerabeen osasun mentala gaur egungo erronka sozial handienetako bat bihurtu da Euskadin ere; izan ere, azken urteotan antsietate- eta depresio-sintomak nabarmen areagotu dira gazteen artean, eta osasun mentaleko kontsultak eta laguntza psikologikoko eskaerak ugaritu dira. Euskal Autonomia Erkidegoko Osasun Inkestaren arabera (2023), 2017 eta 2023 artean bikoiztu eta hirukoiztu egin da antsietate- eta depresio-sintomen prebalentzia nerabeen artean, bereziki nesken artean, eta 15 urtetik beherakoen artean psikologiako profesionaletara jotzeko joera hazi da.

Estatuan ere, ebidentzien arabera, ongizate emozionalak okerrera egin du. UNICEF Espainiak haurren eta nerabeen osasun mentalari buruz argitaratutako iritzi-barometroaren arabera, hamar nerabetik lauk adierazi dute osasun mentaleko arazoren bat izan dutela edo uste dute izan dutela azken urtean, eta horietako askok ez dute laguntzarik eskatu eta ez dute hitz egin ingurukoekin. Oro har, 473 milioi haur baino gehiago (6tik 1) gatazka armatuko eremuetan bizi dira, eta osasun mentaleko arazoen aurrean askoz ere zaurgarriagoak dira laguntza, entzute eta tratu egokirik ematen ez bazaie.

Errealitate horren ondorioz, UNICEF Espainiak "NTP. Coméntalo" eragile anitzeko aliantza abiarazi zuen 2025ean, osasun mentalaren estigma sozialaren aurka gizarte osoa mugiarazteko helburuarekin eta neska-mutilak euren sentimenduez eta emozioez hitz egitera animatuz.

IMQren eta UNICEF Espainiaren arteko hitzarmena berritzeak bat egiten du mugimendu horrekin eta administrazio publikoen, gizarte-erakundeen, ikastetxeen, familien eta osasun-sektorearen artean erantzun koordinatuak artikulatzeko beharrarekin. Aktore anitzeko aliantzaren eta gaur sinatutako hitzarmenaren bidez, IMQk bere osasun-esperientzia, gizarte-sentsibilizaziorako gaitasuna eta komunikazio-kanal guztiak eskaintzen ditu, haurren eta nerabeen osasun mentala babesteko konpainiaren konpromisoa indartzeko.

Era berean, osasun mentalak osasun integralaren zati banaezin gisa duen garrantzia ikusarazteko eta arazo mentalei lotutako estigma murrizteko ekimen bateratuak bultzatzea aurreikusten da.

* UNICEFek ez du konpainia, marka, produktu edo zerbitzurik babesten.