IMQ-k Markel Pérez izendatu du Kirol Medikuntzako Unitateko arduradun berri

19.10.2023

Markel Pérez da, urriaren 11tik, IMQ-k IMQ Zorrotzaurre Klinikan kokatuta duen Kirol Medikuntzako Unitateko arduradun berria, Pablo Aranda doktorea irten ondoren, Athletic Clubeko talde medikoan sartu baita oraintsu.

1993an jaio zen Markel Pérez eibartarra eta Bilboko biztanlea. Medikuntzan graduatu zen, Euskal Herriko Unibertsitatearen eskutik (UPV/EHU), eta Laneko Medikuntza eta Lan Osasuneko espezialitatea du. Taldeko Kirolen Medikuntzako diplomaduna da, eta master bat du Futboleko Prestakuntza Fisiko eta Kirol Berregokitzean, Murtziako Universidad Católica San Antonioren eskutik (UCAM), eta ‘FIFA Diploma in Football Medicine’ ziurtagiria. Halaber, diagnostiko ekografiko aurreratuko, kirol-jarduerako nutrizioko eta bizi-euskarri aurreratuko ikasketak ere baditu, besteak beste.

Bere jardunbide profesionalaren barruan, azpimarratzekoa da Sociedad Deportiva Eibar-eko mediku izan zela 2017-2018. denboraldian. IMQ-k fitxatu arte, Galdakao-Usansoloko Unibertsitate Ospitaleko traumatologia-larrialdietan lan egin du, eta Bizkaiko Futbol Federazioko mediku izan da.

Kirolariak eta beren lesioak prebenitu, baloratu, orientatu, diagnostikatu eta tratatzeaz arduratzen da kirol-medikuntza. Medikuntza-adar horretan espezializatuta dauden sendagileek kirol-lesioak prebenitzen ez ezik, horiek errehabilitatzen ere lagun dezakete, eta kirolariak prest jartzen dituzte kirola egiteari ekiteko. Halaber, hainbat medikuntza-espezialitateren laguntza-figura da, hala nola traumatologia, kardiologia edo errehabilitazio espezialitateena.

IMQ Zorrotzaurre Klinikako Kirol Medikuntzako Unitatea, Markel Pérez medikua buru duena, aukera ederra da kirol-lesioak dizuten pazienteak tratatzeko, bai arreta espezializatua, bai bigarren iritzia eman diezaieten, baina, batez ere, kirola modu osasungarrian egin dadin, lesioak prebenituta.

Unitateak ekipamendu teknologiko aurreratua du, baita bi kontsulta, kirol-azterketa medikoak egiteko gela bat eta beste gela bat, balorazio isozinetikoak egiteko. Klinikako -1. solairuko Kanpo Kontsulten esparruan dago Unitatea.

Kirol-azterketa medikoak egitea Unitatearen zeregin ezagunena bada ere –Euskadiko futbol- eta saskibaloi-klub nagusietako eliteko jolakariei egin ohi dizkien azterketen oihartzunagatik–, IMQ-ko Kirol Medikuntzako Unitateak beste zerbitzu batzuk ere ematen ditu, hala nola kirol-aholkularitza, kirol-nutrizioko kontsulta eta, errendimendua  hobetzeko, entrenamenduen plangintza eta jarraipena. Halaber, zerbitzu hauek ere eskaintzen ditu:

• Kirol-kontsulta medikoa: kirol-lesioen diagnostikoa, balorazioa, tratamendua eta jarraipena, eta kirol-jarduerarekin loturiko beste kontu batzuk.
• Ekografia muskulueskeletikoa: kirol-kontsulta medikoaren barruan, lesioak baloratu eta diagnostikatzeko.
• Kirol-azterketa medikoak, kirol-azpimota guztietara eta bezeroaren egoera fisikora eta adinera egokituak:
  • Lehiaketako kirol-azterketa medikoa: kirolari guztientzat, kirola egiteko zein sasoi duten eta eguneroko entrenamendua optimizatzeko bihotz-tarteak jakin nahi dituztenentzat, bereziki egokia 35 urtetik gorakoentzat edo aurrekari pertsonal edo familiako aurrekari kardiologikoak dituztenentzat, kirola noizean behin edo aldizka egiten dutenentzat, intentsitate neurritsuaz, edo kirol-gaitasunaren ziurtagiria lortu eta beren sasoi orokorra ezagutu nahi dutenentzat.
  • Eliteko kirol-azterketa medikoa: aldizka edota trinko entrenatzen duten kirolarientzat, lehiaketetan parte hartzen dutenentzat, federatuta egon ala ez, eta kirol-baldintzak hobetu nahi dituztenentzat, azido laktikoaren azterketaren bidez entrenamenduko bihotz-tarte optimoak eta atalaseak ezagutu nahi dituztenentzat eta kirol-gaitasunaren ziurtagiria lortu eta beren sasoi orokorra ezagutu nahi dutenentzat.
  • Jarraipeneko kirol-azterketa medikoa: denboraldian zehar entrenamenduen bilakaera egiaztatu nahi duten kirolarientzat, bihotz-maiztasunak, wattak eta erritmoak doitzeko eta, horrela, beren eguneroko saioak eta lehiaketako errendimendua ahalik eta gehien optimizatzeko, denboraldi berean eliteko azterketa egin ondoren.

Kirol-azterketa medikoen funtzio prebentiboari esker, bihotzeko arazoak detektatzeaz gain, gai dira nabarmendu ez diren eta kirol batzuekin larriagotu daitezkeen beste eritasun batzuk baztertzeko.