Athleticeko lehoiek urteko azterketa medikorik zorrotzena gaindituko dute IMQ-rekin Lezaman

09.07.2025

Denboraldi berria iristear dagoela, Athletic Clubeko gizonezkoen taldeko jolakariek urteko medikuntza- eta kirol-azterketarik zorrotzenak hasi dituzte gaur Lezaman. IMQ Alhóndiga zentro medikoko IMQ-ko Kirol Medikuntza Unitateko arduradun Markel Pérez eta IMQ Ajuriaguerra errehabilitazio-zentroko IMQ-ko kirol-kardiologo Zigor Madaria sendagileek gainbegiratuta, clubeko doktore Josean Lekue eta Pablo Arandarekin, futbolariei hainbat proba egiten ari zaizkie, zeinak "zer moduz zaude?" galdera hutsetik baino askoz haratago doazen.

Taupada orok axola duenean

Eguna 8:00etan hasi da odol-analisi baten eta ekokardiograma baten eskutik; bigarren probak sistema kardiobaskularraren morfologia eta funtzioa ebaluatzeko aukera ematen du. "Bihotza aztertzean ez ezik, taupadak nola, noiz eta zergatik egiten dituen ulertzean ere datza", azaldu du Zigor Madaria sendagileak. Izan ere, ikerlan espezializatuen arabera, ekokardiogramaren eta elektrokardiogramaren bitartez, kirolariaren bat-bateko heriotzaren sindromearekin lotutako patologiak eragin ditzaketen kausen % 80-85 baztertu daitezke. Kopuru hori bereziki garrantzitsua da, jakin badakigulako eliteko futbolariek, hainbat ikerketaren arabera, 1,5 aldiz aukera gehiago dituztela gaixotasun kardiobaskularrak garatzeko beren jardunbidean zehar.

Ekokardiogramaren ondoren, unerik zorrotzena iritsiko da: laktato-probak landan. Bi taldetan banatuta, jokalariek erakutsi behar dute beren gorputza azido laktikoa kudeatzeko gai dela; konposatu hori metabolismo anaerobikoan sortzen da, eta muskuluak 'aski da' noiz dioen zehazten du. "Motor batek, erre gabe, gehienezko potentzian funtzionatzeko duen gaitasuna neurtzea bezalakoa da", azaldu du Markel Pérez sendagileak erraz. Eta azalpen hau gehitu du: “laktatoa metatzeak egoera metabolikoa eta estres fisiologikoaren aurreko erantzuna adierazten ditu, eta horrek informazio asko ematen digu kirolariaren errendimenduaren ikuspegitik”.

Itxurak egitea ezinezkoa da tapizean

Ondorengo probek, kirolari bakoitzak lasterketa egiteko tapizean egiten dituenek, funtsezko azterketa-hirukotea ixten dute. Horien bidez, gehikuntzazko esfortzuen aurrean futbolariak duen erresistentzia gaitasuna ebaluatzen da, eta hori erabakigarria da futbolarientzat, partida batean 10-12 kilometro egin baititzakete, esprintak, trostak eta geldialdiak txandakatuta.

Azterketa horiek, ordea, kopuruetatik haraindi doaz. Udaldiko istorio isilak erakusten dituzte: herritar arruntentzat atsedena esan nahi du udak; futbolari profesional batentzat, aldiz, oreka biribila izatea errekuperazioaren eta sasoiaren artean. "Atseden hartzeak ez du esan nahi gelditzea –dio Madariaga doktoreak–, kaltetutako egiturak errekuperatzea eta gorputza 10 hilabeteko gehienezko eskakizunerako prestatzea baizik".

Izan ere, eliteko futbolaria izateak gauza askori uko egitea dakar, hala  nola opilak jateari, eta dieta pertsonalizatuak izan behar dituzte % 4,7 eta % 10,5 arteko gorputz-gantzari eusteko. Jokalariek berariazko karbohidratoak kontsumitu behar dituzte entrenatu aurretik, barazkiak jan behar dituzte otordu guztietan eta 7-9 orduko lo indarberritzailea izan behar dute, hori guztia, nutrizionistek eta medikuek etengabe gainbegiratuta.

Athletic Cluben eta familia zuri-gorriaren aseguratzaile mediko ofiziala den IMQren arteko aliantzak 27 urte bete ditu, eta merkataritza-akordio bat baino askoz gehiago da, bermea ere bada: futbola ikuskizuna baino mugimenduan dagoen osasuna dela ondoen ulertzen dutenek zaintzen dute kirolari horien taupada, arnasketa eta izerdi tanta bakoitza.

Izan ere, gol bakoitzaren atzean bihotz bat dago taupadaka, eta bihotz bakoitzaren atzean, taupadak egiten jarrai dezan arduratzen den mediku-talde bat.