«Bihotz-errehabilitazioa prebentzio kardiobaskularra ere bada»

24.04.2026

Pertsona bat miokardio-infartu batetik bizirik ateratzen denean edo eriondoan dagoenean, adibidez, bihotzeko kateterismo baten ondoren edo bypass bat egiteko edo stent bat jartzeko ebakuntza baten ondoren, osasun-arreta ez da prozedura akutuarekin amaitzen. Hain zuzen ere, une horretan hasten da bihotz-errehabilitazioa, osasun-arreta egituratua, diziplina anitzekoa eta ibilbide luzekoa, bihotzeko gertakari bat izan duten pertsonei bizitza normala berreskuratzen laguntzen diena. Eta zorte onez, hobetzen ere bai.

Euskadiko profil ohikoena

Zigor Madaria doktoreak, Bilboko IMQ Ajuriaguerra errehabilitazio-zentroko kirol-kardiologoak, zehaztu duenez, Euskadin, kardiopatia iskemikoa duen pertsona baten profil ohikoena hau da: «infartu bat eta bularraldeko angina bat izan duten edo bypass edo angioplastia koronario bat egin zaien pertsonak. Hots, bihotzeko arterietatik ondorioztatutako arazoak, horiek baitira, halaber, bihotz-errehabilitazioa gehien behar ohi dutenak».

Hala ere, bihotz-errehabilitazioko zerbitzuen erabiltzaileek profil desberdinak dituzte. Esate baterako, «kardiopatia baten duela gutxiko edozein diagnostikok, baita arrisku faktore handiak dituzten pertsonek ere (tentsio altua, kolesterola, diabetesa, tabakismoa, obesitatea, bizitza oso sedentarioa), nahiz eta oraindik gertaera kardiobaskularrik ez izan, onura handia ateratzen diote hezkuntza- eta ariketa-programari».

Bihotz-errehabilitazioa prebentzio kardiobaskularra ere bada

IMQren kardiologoak ‘Lehenengoa, prebenitzea’ ekimenaren esparruan –IMQ-k prebentzioa osasun-estrategiaren ardatz egituratzaile gisa sustatzeko duela gutxi abian jarri duena– azpimarratu duenez, «zenbat eta lehenago hasi bihotza zaintzen, orduan eta hobeto. Ez da ahaztu behar bihotz-errehabilitazioa prebentzio kardiobaskularra ere badela».

Zertan datza bihotz-errehabilitazioa?

Bihotz-errehabilitazioa «hiru euskarri uztartzen dituen programa egituratu batean datza: balorazio medikoa, ariketa fisiko egokitua eta bizitza osoan zehar osasuna zaintzeko hezkuntza. Hori guztia, kardiologoak, mediku errehabilitatzaileak, fisioterapeutak, erizaintza eta psikologia barne hartzen dituen talde baten laguntzarekin», azaldu du Zigor Madaria doktoreak.

Errehabilitazioa hasi aurretik, ebaluazio oso bat egiten da: historia klinikoa aztertzen da, proba mediko egokiak egiten dira eta arrisku-faktoreak aztertzen dira. «Informazio horrekin, neurrira egindako plan bat diseinatzen da, erabat pertsonalizatua».

Zenbat irauten du bihotz-errehabilitazioak eta nolakoak dira programak?

Programa baten batez besteko iraupena zortzi eta hamabi aste bitartekoa izaten da, eta astean bizpahiru saio izaten ditu. Kasu gehienetan, saio bakoitza ordubete eta ordu eta erdi artekoa izaten da.

«Saio horietan, ariketa aerobikoa agindu ohi da, hala nola bizikleta estatikoa, zintan ibiltzea edo korrika egitea, eta indar-ariketa egokituak (normalean, biziak, kasu jakin bakoitzaren arabera). Lasaitzeko teknikak ere erabiltzen dira», zehaztu du Madaria doktoreak.

«Aldi berean», jarraitu du azaltzen adituak, «profesionalek bana-banako heziketa eta esku-hartzea egiten dute, bizimoduan, nutrizioan, ariketan, gaixotasunean, alarma-sintometan, medikazioan eta tabakoa erretzeari uzteko laguntza espezializatuan gertatzen diren aldaketetan hezteko. Helburua da pazientea autonomoa izan dadila eta bere egunerokoan zer egin jakin dezala».

Zein onura dakar bihotz-errehabilitazioak?

Bilboko IMQ Ajuriaguerra errehabilitazio-zentroko kirol-kardiologoak adierazi duenez, «paziente lagin handiekin egindako nazioarteko hainbat azterlanek frogatu dute bihotz-errehabilitazioak heriotza-tasa % 20 eta % 25 artean murrizten duela bihotzeko gertakari baten ondoren; halaber, berrospitaleratzeak murrizten eta bizi-kalitatea eta gogo-aldartea hobetzen ditu».

«Gure kontsultetan», jarraitu du azaltzen, «pazientea gertakari akutuaren aurretik bezala egon dadin ez ezik, bizitzak lehen baino hobeto egoteko ematen dion aukera berri hori aprobetxatu dezan ere saiatzen gara, bizi-kalitate hobea lortzeko eta aurreko arrisku-faktoreak murrizteko».

Azkenik, helburu hori lortzeko, IMQren kirol-kardiologoak azpimarratu du batera medikazioa ondo egokitzeak eta bizimoduan aldaketak egiteak aldea markatzen dutela: «erretzeari uztea da bihotzaren alde eman daitekeen urratsik garrantzitsuena. Gainera, komeni da elikadura zaintzea (elikagai prozesatu gutxiago eta barazki, fruta, lekale, arrain, haragi, arrautz eta oliba-olio gehiago, hots, oro har, benetako elikagai gehiago), pisu osasuntsua izatea, egunero jarduera fisikoa egitea, tentsioa, kolesterola eta glukosa aldizka kontrolatzea eta, jakina, laguntza eskatzea antsietatea, tristura edo beldur handia nabaritzen badira: osasun emozionalak ere badu garrantzia».