Bilbao Basket nahitaezko azterketa medikoak egiten hasi da IMQ-n hur-hurreko entrenamenduei ekin aurretik

20.08.2025

25-26 denboraldia prestatzeko, Surne Bilbao Basket taldeko jokalariei eliteko kirol-azterketa medikoa egiten hasi zaie Bilboko IMQ Alhóndigako Kirol Medikuntzako Unitatean, denboraldiari ekin aurretik. Proba horien bidez, jokalarien osasun-egoera eta sasoia egiaztatzeaz gain, datuak biltzen dira haietako bakoitzaren denboraldian  zeharreko entrenamendua optimizatzeko.

Bilbao Basketeko zerbitzu medikoen eta IMQ Alhóndigako Kirol Medikuntzako Unitateko arduradun Markel Pérez sendagilearen begirada arretatsupean, beltzez jantzitako gizonak hainbat proba mediko igarotzen hasi dira.

Jokalari hauei egin zaizkie probak gaur: Basala Bagayoko eta Aleix Font. Bihar, hauei: Stefan Lazarevic, Luke Petrasek, Justin Jaworski eta Harald Frey. Aurreko egunetan, harrobiko jokalari hauei: Bingen Errasti, Aimar Mintegui, Oier de las Heras, Antón Alaña eta Haritz Mateo.

«Jokalariekiko harreman oro historia kliniko sakon batetik hasten da, zeinean, jokalariaren jarduera fisikoa baldintza dezaketen aurrekariak edo faktoreak aztertzen diren. Balorazio antropometrikoaz gain —pisua, altuera, gorputz-masaren indizea eta larruazal-tolesturen neurketa barne hartzen dituena, gantz-ehunekoa kalkulatzeko eta kirolariaren nutrizio-egoera ebaluatzeko—, proba medikoak azterketa muskuloeskeletikoa ere barne hartu ohi du, funtsezkoa baita denboraldiaren hasierari begira», adierazi du Markel Pérez sendagileak.

Halaber, IMQ-ko espezialistak laktatoa neurtzen duen esfortzu-probaren garrantzia azpimarratu du: «Ergometria, edo esfortzu-proba, kirolariak ariketa fisikoa egitean baduen egoera egiaztatzeko azterketa espezializatua da, eta, besteak beste, jardueran zehar erantzun kardiakoa eta muskularra aztertzen ditu. Haren bidez, hainbat datu lortzen ditugu, hala nola, jokalari bakoitzaren bihotz-maiztasun maximoa eta atalase aerobikoa eta anaerobikoa; era berean, kasu honetan, proban sortutako laktato-mailak ere erregistratzen dira. Karbohidratoaren degradaziotik eratorritako konposatu kimiko bat da laktatoa, eta zeregin garrantzitsua du kirolarien errendimenduan. Horregatik, interesgarria da hori neurtzea, haren jarraipena egiteko».

«Informazio guztiek», jarraitu du azaltzen IMQ-ko Kirol Medikuntzako Unitateko arduradunak, «jokalari bakoitzaren osasunaren erradiografia zehatza emateaz gain, haren prestakuntza pertsonalizatzea eta optimizatzea ahalbidetzen dute, haren atalase indibidualetara egokitutako entrenamendu-planak diseinatzeko eta lan espezifikoagoa errazteko».

Bilbao Basket taldea prest jarri aurretik test horiek duten garrantzia azpimarratu dute. «IMQrekiko lankidetza funtsezkoa da norabide egokian urratsak emateko denboraldian zehar luza daitekeen sasoi bikaina lortzeko. Informazio horrek lesioak prebenitzen ere lagun diezaguke», azaldu du Surne Bilbao Basketeko Medikuntzako arduradun trebatu Javier Gilek.

IMQ, euskal kirolaren alde

IMQ-k eliteko kirol profesionalaren alde nahiz oinarrizko kirolaren alde egiten du beti, eta kirol-erakundeek etorkizuneko belaunaldien osasuna sustatzeko egiten dituzten jarduera-aukera ugaria babesten du.