Gardentasun eta eskakizun handiagoak, aseguru jardueran kontsumitzaileak babesteko

27.09.2018

• Europar arautegi berriak gardentasun handiagoa dakarkio aseguru-merkatuari, kontsumitzaileak babesteko asmoz: horientzat egokiak ez diren produktuak kontrata ez ditzaten.
• Gainera, aseguru-merkatuan esku hartzen duten operadoreen profesionaltasun- eta lehia-maila igoko du. Halaber, aseguru-erakundeetako enplegatuek beren buruak prestatzeko beharra izango dute.

IMQ-k, Arabako eta Bizkaiko Aseguru Bitartekarien Elkargoekin batera, jardunaldi teknikoa garatuko du gaur IMQ Zorrotzaurre klinikaren entzunaretoan, kontsumitzaileentzat nahiz aseguru-etxe eta bitartekarientzat oso interesgarria den gai honi ekiteko: aseguruen banaketari buruzko zuzentarau berria eta aseguru eta  berraseguru pribatuen banaketari buruzko geroko legea. Biek aldaketa garrantzitsuak ekarriko dizkiote sektoreko jarduerari.

Arautegi berriaren helburu nagusia aseguru-merkatuari gardentasun handiago ematea da, hain zuzen, kontsumitzaileak babesteko, horientzat egokiak ez diren produktuak kontrata ez ditzaten. Horrela, banku-sektorean MiFID II arautegiaren bidez aspalditik ezartzen ari diren printzipioak aplikatuko zaizkio aseguru-sektoreari.

Kontsumitzaileak babesteko helburu hori lortzeko, asegurua kontratatu aurretik informazio gehiago, argia eta ulergarria, eman beharko da. Aldi berean, neurriak hartu dira aseguruak beti bezeroaren onerako sal daitezen, interes-gatazkarik gerta ez dadin eta merkaturatzea aurretik zehaztutako xede-merkatuarekin bat etor dadin.

Aseguru-etxeek aldizka aztertu beharko dute aseguru bakoitza nola banatzen ari den, eta desbideratzerik dagoela antzematen bada, neurri zuzentzaileak hartu beharko dituzte. Izan ere, zuzeneko salmentak ez ezik, bitartekari-sarea ere egiaztatu beharko dute aseguru-etxeek eta, ondorioz, elkarren arteko komunikazioa eta informazio-trukea indartu, salmenta lege-betekizunen arabera egin den egiaztatzearren.

Arautegiak alderdi berri garrantzitsuak dakartza, aseguru-merkatuan esku hartzen duten operadoreen profesionaltasun- eta lehia-maila igotzeko. Esate baterako, aseguru-erakundeetako enplegatuek –orain arte Bitartekotza Legearen eremutik at zeudenak– beren buruak prestatu beharko dituzte, baita banaketaz arduratzen diren zuzendariek ere.

Halaber, IMQ-k antolaturiko jardunaldian hainbat alderdi berriri ekingo zaio: erregistroak, finantza-bermeen eraentza eta arau-hauste eta zehapenen sistema.

Lege-proiektua oraindik Parlamentuan izapidetzen ari bada ere, Zuzentaraua urriaren 1etik aurrera aplikatuko da. Alderdi batzuk ez dira galdagarriak izango Legea onetsi arte, baina beste batzuk, esaterako kontratu aurreko informazioari dagozkionak, erabat aplikatuko dira datorren astelehenetik aurrera.