Zorrotzaurre Klinikak tratamendu onkologikoaren doitasuna eta segurtasuna hobetzen dituen azken belaunaldiko OTA planifikatzailea sartu du

22.04.2026

IMQ Zorrotzaurre Klinikak ordenagailu bidezko tomografia axial (OTA) planifikatzailea sartu du oraintsu, diagnostikoan eta, bereziki, erradioterapiako tratamendu onkologikoen plangintzan eta erradiologia orokorreko azterketa aurreratuetan doitasuna hobetzeko funtsezko ekipamendua dena. Teknologia berri hori aurrerapausoa da berrikuntza sanitarioaren aldeko apustuan IMQren euskarri estrategikoak diren tratamenduen pertsonalizazioari eta pazienteen segurtasunari dagokienez.

OTA berria erradioterapiako tratamenduak planifikatzeko berariaz diseinatuta dago, irudia eskuratzeko eta arnas mugimendua aztertzeko teknologia aurreratuak txertatzen baititu. 4D azterketei eta arnas sinkronizazioko kamera bati esker, ekipoa gai da arnasketarekin mugitzen diren lesioen irudi garbiak eta ia estatikoak lortzeko, hala nola toraxean edo goiko sabelaldean daudenak. Doitasun horrek aukera ematen du erradiazio-dosia tumorera zehaztasun handiagoz doitzeko, eta, horrela, inguruko ehun osasuntsuen irradiazioa minimizatzen da.

“OTA planifikatzailearen balio nagusia da tumoreak gorputzean benetan nola jokatzen duen ikusteko aukera ematen digula, pazientearen arnas mugimendua kontuan hartuta”, azaldu du Alicia Olarte doktoreak, IMQ Zorrotzaurre Klinikaren onkologia erradioterapikoko zerbitzuko mediku espezialistak. “Horrek tratamendu zehatzagoak, eraginkorragoak eta, batez ere, seguruagoak ahalbidetzen ditu, plangintzan ziurgabetasuna eta errore-marjina murrizten ditugulako”, adierazi du.

Ekipo berriaren beste ezaugarri nabarmenetako bat da 85 zentimetroko irekidura handia duela, pazienteari kokapen erosoagoa ematen diona eta prozesu terapeutiko osoan posizioaren erreproduzigarritasuna hobetzen duena. Alderdi hori bereziki garrantzitsua da erradioterapiako tratamenduetan, zeinetan doitasun milimetrikoa erabakigarria den arrakasta klinikoa lortzeko.

Era berean, OTAk badu metalezko artefaktuak ezabatzeko sistema aurreratua, protesiak edo bestelako inplanteak dituzten pazienteen irudiaren kalitatea nabarmen hobetzen duen berrikuntza dena. Funtzionalitate horri esker, azterketa diagnostiko fidagarriagoak eta plangintza doituagoak lor daitezke, baita orain arte zailtasun tekniko handiagoak zituzten kasu konplexuetan ere.

Iñigo Lecumberri doktorearen IMQ Zorrotzaurre Klinikaren Erradiodiagnostikoko mediku espezialistak hitzetan, “teknologia-mota horrek medikuntzaren agertoki gero eta pertsonalizatuago batean kokatzen gaitu, non tratamendu bakoitza zehatz-mehatz egokitzen den paziente bakoitzaren anatomiara eta ezaugarrietara, eta hori funtsezkoa da minbiziari ekiteko”.

Ekipamendu hori sartu izanari esker, IMQ Zorrotzaurre Klinikak asistentziaren bikaintasunarekin, berrikuntza teknologikoarekin eta pazientearen esperientziaren etengabeko hobekuntzarekin duen konpromisoa indartu du; hala, erreferentziazko zentro gisa sendotu da irudi bidezko diagnostikoan eta tratamendu onkologikoan Euskadin.