Pazienteak oinarri dituen arreta indartzeko komunikazioaren dekalogoa aurkeztu du IMQ-k

15.04.2025

Pazienteen Eskubideen Europako Eguna –apirilaren 18a– dela eta, Virgen Blanca eta Zorrotzaurre IMQ Klinikek komunikazioko jardunbide egokien dekalogoa sortu dute osasun-arloko profesionalen, pazienteen eta horien senideen arteko konfiantza-lotura indartzeko eta arreta bigunduagoa, ulergarriagoa eta enpatikoagoa bermatzeko. Bereziki, dekalogo horrek badu zerikusia Pazienteen Eskubideen Europako Gutuna osatzen duten hamalau atalekin.

Dekalogo hori IMQ Kliniketako taldeen artean zabalduko da eta langileen etengabeko prestakuntza-programetan sartuko da Taldearen asistentzia-ereduaren bereizgarri den pazientearengan oinarritutako ikuspegiaren zati gisa.

IMQ-k asistentziaren etengabeko hobekuntzarekin eta segurtasun klinikoarekin duen konpromisoaren parte da ekimena, eta kliniketako langileentzako printzipio baliagarri batzuk bildu ditu, hala nola pazientea egoki agurtzea eta ongi etorria dela ezagutaraztea, hizkuntza ulergarria  erabiltzea, adi-adi entzutea edo egoera larrietan neurriz jokatzea; hala bada, pertsona osasun-prozesuaren erdian jartzea du helburu dekalogoak.

«Paziente batek jasotzen duen komunikazioak zuzenean eragiten dio haren ongizateari eta jasotako zaintzaren pertzepzioari, baina, batez ere, prozesu terapeutikoaren eraginkortasunari eta haren senideek asistentzia-prozesu osoarekin duten harremanari», azaldu du Isabel Urrutiak, IMQ Kliniketako Kalitatea eta Pazienteen Segurtasuna arloko zuzendariak. «Horregatik, komunikazio enpatikoa eta argia sustatzea kontu etikoa ez ezik, asistentziaren kalitaterako eta segurtasun klinikorako ezinbesteko tresna ere bada».

Urrutiak agerian jarri du, askotan, «pazienteak kaltebera, segurtasunik gabe edo nahasita sentitzen dira egoera ezezagunei aurre egiten dietenean. Eta gauza bera gertatzen da askotan senideekin, zenbaitetan egoera berriei aurre egin behar izaten baitiete haientzat ezezagunak diren inguruneetan. Osasunaren arloko profesional gisa egiten dugun lana diagnostikotik, tratamendutik eta zainketetatik haratago doa: adi-adi entzutea, argi azaltzea eta horien guztien zalantza eta beharrei erantzuteko prestasuna erakustea ere badakartza. Uste dut dekalogo horren bitartez lortu dugula tresna erabilgarri bat eratzea, bai guretzat, bai zaintzen ditugun pertsonentzat».

Dekalogoak hamar funtsezko gomendio hauek ditu:

1. Agurtu pazientea

Pazientea agurtzean, erakutsi bere presentzia garrantzitsua dela zuretzat. Ezarri kontaktu bisuala, eman eskerrak zentro horretan konfiantza jarri izanagatik, eta jarri arreta osoa. Sentiarazi eroso eta gustura.  

2. Emaiozu balioa

Zure buruari ematen diozun balioaz jabetuta lortzen da hori; hortaz, zu tratatzea gustatuko litzaizukeen moduan tratatu pazientea. Jakinarazi garrantzisua zarela.

3. Galdetu pazienteari

Batzuetan, pertsonei kosta egiten zaie esatea zer pentsatzen duten edo zer nahi duten ingurune arrotz batean daudenean, ospitalean, esaterako. Arakatu zer nahi duen.

4. Entzun pazienteari

Zenbaitetan, presaka lan egiten da, eta horrek zaildu egin dezake pazienteei behar beste arreta ematea. Haiekin igarotzen ditugun aldiak optimizatzeko eta aprobetxatzeko gai izan behar dugu. Jarri arreta pazientearengan.

5. Erabili hizkuntza ulergarria

Mintzatu azalpen argi eta zehatzekin pazienteari; ematen dugun informazioa jasotzen duen pertsonak argi ulertu eta buruan gorde behar du. Ez erabili pazienteak ezagutzen ez duen hitzik.

6. Lagundu pazienteari

Paziente orok berezko premiak ditu, klinikara joateko arrazoiaz gain. Saia zaitez horrek behar duen guztian laguntzen. Pazientea babesgabe sentitzen da.

7. Izan zaitez objektibo

Nahigaberik gertatuz gero, eman konponbide bat zure eskuetan dagoen mugaraino. Ez eman arrazoia pazienteari, eta ez aprobetxatu lan-sistema kritikatzeko. Saia zaitez pazienteari irtenbideak proposatzen.

8. Informa zaitez prozesu osoaz

Garrantzitsua da gainerako zerbitzuetan egiten den jarduera ezagut dezazula, baita kokapena eta sartzeko modua ere. Horrela, errazagoa izango da edozein erabiltzaileri orientazioa edo informazioa ematea.

9. Ikasi errakuntzetatik

Gure errakuntzei buruz hausnartzea da horiek etorkizunean gainditzeko eta gure profesionaltasuna hobetzeko modurik onena. Erratzea gizatiarra da; benetako “errakuntza” ez ikastea da.

10. Gonbidatu pazientea itzultzera

Benetako paziente ez da gure zerbitzuak erabiltzen dituena, baizik eta berriro erabiltzen dituena, itzultzen dena edo gure zerbitzuak beste batzuei gomendatzen dizkiena. Pazientea beti izango da ongi etorria.